इन्द्रेणीपोष्ट
विराटनगर । प्रदेश १ का मुख्यमन्त्री राजेन्द्र राईले विश्वासको मतका लागि आज (सोमबार) प्रदेशसभामा प्रस्ताव दर्ता गर्ने भएका छन् ।
कात्तिक ३० गते मंगलबार बस्ने प्रदेशसभा बैठकमा मुख्यमन्त्री राईले विश्वासको मत लिने तयारी रहेको छ ।
दुई दिनअघि विश्वासको मतसम्बन्धी प्रस्ताव संसद् सचिवालयमा दर्ता गर्नुपर्ने प्रावधान भएका कारण मङ्गलबार दिउँसो १२ः३० मा बस्ने प्रदेशसभा बैठकमा विश्वासको मत लिनका लागि आज प्रस्ताव दर्ता गर्ने तयारी भएको प्रदेश १ का आर्थिक मामिला तथा योजनामन्त्री इन्द्रबहादुर आङ्बोले जानकारी दिए ।
आजै क्याबिनेट बस्ने र क्याबिनेट निर्णयपछि विश्वासको मतसम्बन्धी प्रस्ताव दर्ता हुने उनले बताए ।
गत कात्तिक १६ गते पाँच दलीय गठबन्धनका तर्फबाट नेकपा (एकीकृत समाजवादी)का नेता राई मुख्यमन्त्री नियुक्त भएका थिए भने मङ्गलबार विश्वासको मत लिएपछि मात्रै सरकार विस्तारको काम गर्ने उनले बताउँदै आएका छन् ।
