इन्द्रेणीपोष्ट
धनगढी । हिजो (बिहीबार) दिउँसोदेखि लगातारको हिमपातका कारण सुदूरपश्चिमको पहाडी तथा हिमाली क्षेत्रको जनजीवन कष्टकर बनेको छ ।
मौसममा आएको परिवर्तनसँगै बाजुरा, अछाम, डोटी, डडेल्धुरा, बैतडी, बझाङ र दार्चुलामा हिजोदेखि हिमपात हुन रोकिएको छैन ।
सुदूरपहाडका विभिन्न जिल्ला जोडने राजमार्ग क्षेत्रमा भारी हिमपात भएपछि सवारी आवागमन रोकिएको छ ।
हिमपातले राजमार्ग अवरुद्ध हुँदा धनगडीबाट पहाडी जिल्लाका लागि छुटेका दिवा तथा रात्री सेवाका यातायातका साधन बाटोमै रोकिएका छन् ।
हिउँ पर्ने क्रम जारी रहेको र बाटो खोल्ने प्रयास नहुँदा यात्रुहरू बीच बाटोमै अलपत्र परेका छन् ।
हिमपातका कारण सुदूरपहाडमा विद्युत तथा संचार सेवा पनि अवरुद्ध भएको छ । विद्युत पोल ढलेर पहाडी जिल्लामा बिजुली सेवा पनि अवरुद्ध छ ।
हिमपात र वर्षातका कारण जिल्लाको टेलिफोन तथा इन्टरनेट सेवासमेत पूर्णत अवरुद्ध भएपछि जिल्लाको जनजीवन अस्तव्यस्त भएको हो । पहाडी जिल्लाबाट प्रसारण हुने एफएम रेडियोको प्रसारण सेवा पनि अवरुद्ध बनेको छ ।
