इन्द्रेणीपोष्ट
काठमाडौं । सत्तारुढ पाँच राजनीतिक दलले चैत ३० गतेभित्र सहकार्यको भावना अनुसार तालमेलको टुंगो लगाउन प्रदेश र जिल्ला समितिहरूलाई निर्देशन दिएका छन् ।
कांग्रेस नेता रामचन्द्र पौडेलको संयोजकत्वमा गठन भएको स्थानीय निर्वाचन परिचालन तथा अनुगमन समितिको आइतबार दिउँसो प्रधानमन्त्री निवास बालुवाटारमा बसेको बैठकले प्रदेशहरूलाई स्थानीय आवश्यकता र गठबन्धनको भावनाअनुसार तालमेलको टुंगो लगाउन निर्देशन दिएको हो ।
बैठकपछि समितिले प्रदेश र जिल्लाले २०७८ चैत मसान्ताभित्र पाँच दलीय बैठक राखी सहमति कायम गरी केन्द्रमा पठाउन भनेको छ ।
केन्द्रमा रहेको पाँचदलीय गठबन्धनको मर्म, भावनाअनुसार नै वैशाख ३० गते हुने स्थानीय तहको निर्वाचनमा तालमेलको निर्णय लिन पनि प्रदेश समितिलाई आग्रह गर्ने निर्णय भएको छ ।
सोमबार बिहान ९ बजे बस्ने पाँच राजनीतिक दलका शीर्ष नेताहरूको बैठकले स्थानीय तह निर्वाचनमा सत्ता गठबन्धनमा रहेका राजनीतिक दलहरूबीच चुनावी तालमेल गरेर जानेसहितका विषयमा आमजनतालाई अपिल गर्ने तयारी छ ।
बिहानको बैठकपछि नै उनीहरूले संयुक्त अपिल जारी गर्ने सम्भावना बढी रहेको बैठकमा सहभागी एक नेताले जानकारी दिए । यो समाचार नागरिक दैनिकमा छ ।
