प्रतिनिधिसभा बैठक

प्रतिस्थापन विधेयकबाट बजेट ल्याएपछिकाे पहिलो संसद् बैठक बस्दै

प्रतिपक्षी दल नेकपा (एमाले)ले आज पनि बैठक अवरुद्ध गर्ने

1.1K

प्रतिस्थापन विधेयकबाट बजेट ल्याएपछिकाे पहिलो संसद् बैठक बस्दै

काठमाडौं । प्रतिनिधिसभाको बैठक आज (आइतबार) दिउँसो बस्दैछ । संघीय संसद सचिवालयका अनुसार दिउँसो १ बजेका लागि संसद बैठक डाकिएको हो ।

प्रमुख प्रतिपक्षी दल एमालेको विरोधका बाबजुध सरकारले प्रतिस्थापन विधेयकबाट बजेट ल्याएपछि पहिलोपटक आज संसद बैठक बस्न लागेको हो । एमालेले आज पनि बैठक चल्न नदिने तयारी गरेको छ । एमाले संसदीय दलका प्रमुख सचेतक विशाल भट्टराईले सभामुखले आफ्ना मागहरुप्रति वेवास्ता गरेकाले आजको बैठक पनि चल्न नदिने बताए । गएको शुक्रबार एमालेको विरोधका बीच अर्थमन्त्री जनार्दन शर्माले बजेट प्रतिस्थापन विधेयक संसदमा प्रस्तुत गरेका थिए ।

छिल्लो समय एमालेले लगातार संसद बैठक अवरुद्ध गर्दै आएको छ । एमाले फुटाउन सभामुख अग्नी सापकोटाले भूमिका खेलेको आरोप एमालेको छ । एकीकृत समाजवादीतिर लागेका आफ्ना १४ सांसदलाई गरिएको कारबाही सभामुखले सदर नगरेको आरोप एमालेले लगाएको छ ।

कांग्रेस, माओवादी लगायतका सत्तारुढ दलले भने एमालेको माग असंवैधानिक भएको तर्क गरेका छन् । सभामुख सापकोटाले पनि अदालतमा विचाराधिन तत्कालिन एमाले सांसदमाथिको कारबाहीको विषयमा संसदमा वहस हुन नसक्ने प्रस्टीकरण दिएका छन् ।