इन्द्रेणीपोष्ट
काँक्रेविहार सुर्खेत, १३ साउन – भेरी नदीमा पानीको सतह बढेको भन्दै जाजरकोट जिल्ला प्रशासन कार्यालयले नदी तटीय क्षेत्रका बासिन्दालाई सतर्कता अपनाउन आग्रह गरेको छ । भेरी नगरपालिका–१ रिम्ना जाजरकोटस्थित भेरी रिम्जलमापन केन्द्रमा पानीको वहावमा वृद्धि भएपछि जोखिम हुन सक्ने भन्दै सतर्क रहन प्रशासनले आग्रह गरेको हो ।
जाजरकोटका प्रमुख जिल्ला अधिकारी मेखबहादुर मङ्ग्रातीले जलसतह खतरा तहको आसपास पुगेकाले नदी किनारमा बसोबास गर्नेहरूलाई सर्तक रहन सूचित गरिएको जानकारी दिएका छन । उनले भने, “भेरी नदीमा जलसतह बढ्दो क्रममा छ, नदी किनारका बस्तीलाई सतर्क रहन र आवश्यक सावधानी अपनाउन भनिएको छ । प्रहरीलाई पनि आवश्यक तयारीमा रहन भनिएको छ ।”
यस्तै, डोल्पाका प्रमुख जिल्ला अधिकारी रोमबहादुर महतले पनि भेरी नदीमा पानीको सतह बढेकाले सतर्कता आवश्यक रहेको बताउँदै सम्भावित जोखिम न्यूनीकरणका लागि आवश्यक सूचना प्रवाह गरिएको जानकारी दिए ।
प्रशासनले नागरिकलाई अनावश्यक रुपमा नदी किनारतर्फ नजान, बालबालिकालाई विशेष निगरानीमा राख्न र आकस्मिक अवस्थाको जानकारी तुरुन्तै नजिकको सुरक्षा निकायलाई दिन आग्रह गरेको छ ।
आइतबार, साउन १८ गते २०८२
Aug 03 2025 Sunday
