इन्द्रेणीपोष्ट
काठमाडौँ, १७ साउन — राजधानी काठमाडौँमा आपराधिक क्रियाकलाप नियन्त्रणका लागि प्रहरीले सञ्चालनमा ल्याएको ‘अपरेशन’ रोकिने संकेत देखिएको छैन । जिल्ला प्रहरी परिसर काठमाडौँका प्रमुख प्रहरी वरिष्ठ उपरीक्षक एसएसपी विश्व अधिकारीले गुण्डा र अपराधिक समूहको गतिविधि नियन्त्रण गर्न अपरेशन सघन रूपमा अघि बढाइने बताएका छन् ।
“गुण्डाहरूले टाउको उठाउने ठाउँ पाउने छैनन्,” अधिकारीले स्पष्ट पारे, “काठमाडौँमा यस्ता अवाञ्छित गतिविधि गरेकाहरूको नामावली सङ्कलन भइसकेको छ । खोजीखोजी कारबाहीको दायरामा ल्याइँदै छ ।”
यसै अभियान अन्तर्गत शुक्रबार काठमाडौँको महराजगञ्जस्थित होटेल साम्बालाबाट ४७ जनालाई पक्राउ गरिएको थियो । तीमध्ये कुख्यात चक्रे मिलन भनिने मिलन गुरुङसहित १९ जनाविरुद्ध सार्वजनिक हितविपरीतको गतिविधिमा संलग्न भएको अभियोगमा मुद्दा दर्ता गरी सात दिनको म्याद थपेर अनुसन्धान भइरहेको छ ।
अन्य २८ जनालाई भने प्रहरीमा नियमित हाजिरी गराउने शर्तमा रिहा गरिएको भए पनि अनुसन्धान भने अझै चलिरहेको अधिकारीले जानकारी दिए । उनले भने, “१९ जनाविरुद्ध थप उजुरी आउन सक्ने भएकाले जो कोहीले पनि उजुरी दिन सक्नुहुन्छ । उनीहरू अन्य कस्ता आपराधिक क्रियाकलापमा संलग्न छन् भन्ने विषयमा अनुसन्धान भइरहेको छ ।”
काठमाडौँ उपत्यका अपराध अनुसन्धान कार्यालयको समन्वयमा काठमाडौँमा आपराधिक तत्वविरुद्धको अपरेशन जारी रहेको प्रहरीको भनाइ छ । प्रहरी स्रोतका अनुसार गुण्डा, तस्कर र संगठित अपराधमा संलग्नलाई नियन्त्रणमा लिन अबका दिनहरूमा झनै कठोर कदम चालिनेछ ।
शनिबार, साउन १७ गते २०८२
Aug 02 2025 Saturday
