इन्द्रेणीपोष्ट
त्रिशूली नुवाकोट, १४ साउनः आज बिहान ३ः०० बजेदेखि भोटेकोसीमा आएको भीषण बाढीले त्रिशूली नदीको जलसतह एक्कासि बढेको छ, जसका कारण तटीय क्षेत्रमा उच्च जोखिम सिर्जना भएको छ। रसुवा र नुवाकोटका स्थानीय प्रशासनले नदी आसपासका बासिन्दालाई सतर्क रहन र आवश्यक परे सुरक्षित स्थानमा सारिन अनुरोध गरेका छन् ।
नुवाकोटका सहायक प्रमुख जिल्ला अधिकारी कृष्णप्रसाद हुमागाईका अनुसार बाढीले जिल्लाको पैरेबेँसी, वेत्रावती, त्रिशूली, देवीघाटलगायतका क्षेत्रमा कटान गरेको छ। बाढीको बहाव तीव्र रहेकाले बस्तीमा पस्न सक्ने सम्भावना उच्च रहेको र थप क्षति हुन नदिन अग्रिम सावधानी अपनाउन जरुरी रहेको उनले बताए ।
नेपाल प्रहरी र सशस्त्र प्रहरी बलका टोलीले माइकिङ गर्दै नदी किनार नजिकका बासिन्दालाई सतर्क गराउँदै सुरक्षित स्थानमा जान आग्रह गरिरहेका छन् ।
यस बाढीका कारण किस्पाङ गाउँपालिका–५ स्थित ‘त्रिशूली–काठमाडौँ प्रसारण लाइन’को स्टेशनमा पनि क्षति पुगेको छ । विद्युत आपूर्तिमा असर पर्न सक्ने सम्भावनाले चिन्ता थपिएको छ ।
प्रशासनले संभावित जोखिम क्षेत्रका बासिन्दालाई नदीको बहावबारे सूचित भइरहनु र अनावश्यक रुपमा नदी किनार नजिक नजान आग्रह गरेको छ । लगातारको वर्षाले बाढी अझ फैलन सक्ने पूर्वानुमान छ ।
आइतबार, साउन १८ गते २०८२
Aug 03 2025 Sunday
