काठमाडौँ, १८ भदौः नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल ‘प्रचण्ड’ले जनयुद्धमा महिलाको सहभागिताले नै नेपालको संविधानमा महिलालाई ३३ प्रतिशत अधिकार सुनिश्चित गराएको दाबी गरेका छन । उनले वैज्ञानिक समाजवाद स्थापनाका लागि विचार मिल्ने इमान्दार शक्तिबीच एकता अपरिहार्य रहेको बताउँदै संविधान र उपलब्धि उल्ट्याउने प्रयासविरुद्ध सचेत रहन सबैलाई आग्रह गरे ।
अखिल नेपाल महिला सङ्घ क्रान्तिकारीको सातौँ राष्ट्रिय सम्मेलनको आज उद्घाटन गर्दै अध्यक्ष दाहालले हजारौँ महिलाले जनयुद्धमा गरेको बलिदान र सहभागिताले नै सङ्घीय लोकतान्त्रिक गणतन्त्र, गणतन्त्रात्मक शासन प्रणाली र राज्यका संरचनामा महिलाको प्रतिनिधित्व सम्भव भएको स्पष्ट पारे । उनले भने, “यदि महिलाको योगदान र त्याग नभएको भए आज हामीसँग ३३ प्रतिशत अधिकार हुने कुरै थिएन ।”
दाहालले देशमा स्थिरता र सुशासन कायम गर्न प्रत्यक्ष निर्वाचित कार्यकारी प्रमुखको आवश्यकता पुनः औंल्याए । उनले संविधान निर्माणकै क्रममा जननिर्वाचित कार्यकारी प्रमुख र पूर्ण समानुपातिक निर्वाचन प्रणाली अनिवार्य हुनुपर्ने बताएको स्मरण गर्दै अहिले त्यो आवश्यकता झन् बढी देखिएको बताए । संविधानले सबै उद्देश्य पूरा गर्न नसके पनि सम्झौताको दस्तावेजका रूपमा ल्याइएको स्वीकार गर्दै उनले हाल संविधान कार्यान्वयनभन्दा उपलब्धि उल्ट्याउने खतरा बढेकोप्रति चिन्ता व्यक्त गरेका छन ।
सम्मेलनलाई सम्बोधन गर्दै माओवादी उपाध्यक्ष पम्फा भुसालले महिलाको पूर्ण मुक्ति वैज्ञानिक समाजवादमार्फत मात्र सम्भव हुने विचार व्यक्त गरेकी छिन । उनले उत्पादनका स्रोतमा समान पहुँच, क्षमता र योगदानका आधारमा मात्र महिलाको अधिकार स्थापित हुने भन्दै उपलब्ध अधिकारको रक्षा गर्दै थप अधिकारका लागि निरन्तर सङ्घर्ष गर्नुपर्नेमा जोड दिइन ।
त्यस्तै, माओवादी नेतृ शशि श्रेष्ठले संविधानमा व्यवस्था भएका महिला हक अधिकारको कार्यान्वयनका लागि सम्पूर्ण महिला एकताबद्ध हुनुपर्नेमा जोड दिएकी छन । उनले समानुपातिक समावेशी सिद्धान्तलाई बलियो बनाउनुपर्ने बताउँदै संविधान संशोधनका क्रममा महिलाको अधिकार खोसिन सक्ने सम्भावनाप्रति सबैलाई सचेत गराएकी छन ।
भरतपुर महानगर प्रमुख एव महिलासंघकी महासचिब रेनु दाहालले महिलाले पाएको जिम्मेवारी उत्कृष्ट ढङ्गले निर्वाह गरिरहेको तथ्य प्रस्तुत गर्दै अझै अधिकार दिने विषयमा कञ्जुस्याइँ गर्न नहुने धारणा राखिन ।
कार्यक्रममा अध्यक्ष दाहालले अल्किना बमद्वारा लिखित कृति ‘जुनकिरी हराएको रात’ को लोकार्पण समेत गरेका थिए ।