काठमाडौँ, १५ साउनः नेकपा एमालेले आगामी भदौ २० देखि २२ गतेसम्म ललितपुरको गोदावरीस्थित सनराइज हलमा हुने दोस्रो विधान महाधिवेशनको तयारीलाई तीव्र बनाउँदै विभिन्न व्यवस्थापकीय जिम्मेवारी बाँडफाँड गरेको छ ।
महाधिवेशन सफल बनाउन नेताहरूलाई विभागीय जिम्मेवारी दिइएको एमाले केन्द्रीय कार्यालयका सचिव डा.भीष्म अधिकारीले जानकारी दिएका छन । महासचिव शङ्कर पोखरेलको अध्यक्षतामा बुधबार बसेको बैठकले प्रतिनिधिको अन्तिम सङ्ख्या यकिन गर्न सङ्गठन विभागलाई जिम्मा दिएको छ । यस अन्तर्गत १०औँ महाधिवेशनका प्रतिनिधिमध्ये मृत्यु भएका, पार्टी परित्याग गरेका वा अन्य कारणले नआउने प्रतिनिधिहरूको विवरण सङ्कलन गरिनेछ ।
स्वास्थ्य सेवा व्यवस्थापनको जिम्मा स्वास्थ्य तथा जनसङ्ख्या विभाग प्रमुख कृष्णगोपाल श्रेष्ठलाई दिइएको छ भने स्वयंसेवक परिचालनको जिम्मेवारी जनसङ्गठन समन्वय संयन्त्र प्रमुख भानुभक्त ढकालले पाउने भएका छन् । सचिवालय तथा खानपान व्यवस्थापन डा.अधिकारीकै संयोजनमा हुनेछ ।
त्यस्तै, प्रचारप्रसारको जिम्मा प्रचार तथा प्रकाशन विभाग प्रमुख राजेन्द्र गौतमलाई दिइएको छ भने स्वागत र सांस्कृतिक कार्यक्रमको संयोजन केन्द्रीय सदस्य हेमराज राईले गर्नेछन् । यातायात तथा मञ्च व्यवस्थापन केन्द्रीय सदस्य विनोद श्रेष्ठको जिम्मामा तोकिएको छ ।
महाधिवेशन प्रतिनिधिका लागि आवासको व्यवस्था व्यक्तिगत रूपमा गर्नुपर्नेछ । तर, आवश्यक परेमा सम्बन्धित जिल्ला वा प्रदेश सम्पर्क समन्वय समितिले व्यवस्थापन गर्नेछ । यसका लागि लालबाबु पण्डितलाई विभागीय इन्चार्जको जिम्मेवारी दिइएको छ ।
महाधिवेशनमा देशभरबाट २,२७९ प्रतिनिधि सहभागी हुने कार्यक्रम रहेको छ ।