इन्द्रेणीपोष्ट
काठमाडौँ, २५ साउनः नेपाल प्रिमियर लिग एनपीएलको दोस्रो संस्करणका लागि शनिबार सम्पन्न मिनी अक्सनमा आठ टोलीले ३७ खेलाडी अनुबन्ध गरेका छन् । छनोट गरिएका १६४ खेलाडीमध्ये पहिलो चरणमा २६ तथा ‘विस लिस्ट’ बाट थप ११ खेलाडी चयन भएका हुन् ।
अक्सनमा ‘ए’ श्रेणीका देव खनाल, अर्जुन साउद, आदिल आलम र पवन सर्राफलाई जनही रु १५ लाखमा खरिद गरिएको छ । त्यस्तै, दिलीप नाथ, शेर मल्ल, हेमन्त धामी, सूर्य तामाङ, सन्तोष यादव र युवराज खत्री जनही रु १० लाखमा अनुबन्ध भएका छन् ।
जनकपुर बोल्ट्सले मयन यादवलाई रु ७ लाख ७५ हजारमा, काठमाडौँ गोर्खाजले आकाश त्रिपाठीलाई रु ७ लाखमा अनुबन्ध गरेको छ । अन्य खेलाडीहरू ५ लाखदेखि २ लाख रुपैयाँसम्ममा अनुबन्ध भएका छन् ।
यो अक्सनमा १५० खेलाडी सहभागी भएका थिए । प्रत्येक टोलीले ११ नेपाली खेलाडी भित्र्याइसकेकाले अब कम्तीमा चार विदेशी खेलाडी अनुबन्ध गर्नेछन् । सबैभन्दा बढी खर्च चितवन राइनोजले रु ३९ लाख र सबैभन्दा कम पोखरा एभेन्जर्सले रु ११ लाख गरेको छ ।
शुक्रबार, भदौ २० गते २०८२
Sep 05 2025 Friday
