इन्द्रेणीपोष्ट
काठमाडौं । नेकपा (एमाले)को १०औँ महाधिवेशनबाट अध्यक्षमा केपी शर्मा ओली दोस्रो कार्यकालका लागि निर्वाचित भएका छन् ।
चितवनको सौराहामा जारी दसौँ महाधिवेशनको मतगणनामा जम्मा खसेको २ हजार ९६ मतमध्ये अध्यक्ष ओलीले १८०८ मत पाएका छन् । तर यसलाई निर्वाचन आयोगले पुष्टि गरिसकेको छैन ।
उनीसँग प्रतिस्पर्धामा उत्रिएका भीम रावलले २ सय १३ मत मात्रै ल्याउन सफल भएका बताइएको छ । ओलीको पक्षमा ८९.४६ प्रतिशत महाधिवेशन प्रतिनिधिले रोजेका छन् । रावलले १०.५४ प्रतिशत मत आफ्नो पक्षमा पार्न सफल भएका छन् ।
एमाले नेता महेश बस्नेतले ओली फराकिलो मतान्तरसहित विजयी भएको बताएका छन् । 'उहाँ (केपी शर्मा ओली) २१३ का विरुद्ध १८०८ को भारी निर्वाचित हुनुभएको छ', उनले भने ।
निर्वाचन आयोगका अनुसार मुचुल्कामा हस्ताक्षर गरेपछि औपचारिकरुपमा परिणाम सार्वजनिक गरिने छ । अहिले उपाध्यक्षको मत गणना सुरु भइसकेको छ। उपाध्यक्षमा रामबहादुर थापा 'बादल'ले अग्रता बनाएका छन् ।
उनले ४०० मत कटाउँदा घनश्याम भुसालले ६१ मत मात्रै ल्याउन सफल भएका छन् । उपाध्यक्षको सकिएपछि सचिव र केन्द्रीय सदस्यको मत गणना हुने एमाले निर्वाचन आयोगले जनाएको छ ।
ओलीले सुरुमै सर्वसम्मत नेतृत्व चयन गर्ने प्रयास गरेका थिए। तर रावलले अस्वीकार गरेपछि निर्विरोध नभएका पदमा निर्वाचन भएको थियो । रावलको असहमतिपछि सोमबार राति नै मतदान प्रक्रिया अघि बढाइएको थियो ।
मंगलबार बिहान ४ बजेदेखि सुरु भएको मतदान साढे ११ बजे सकिएको थियो । २ हजार १५३ मतदातामध्ये २ हजार ११४ मत खसेको केन्द्रीय निर्वाचन आयोगले जनाएको छ । एमाले केन्द्रीय निर्वाचन आयोगले विद्युतीय मतदानको अन्तिम मतपरिणाम सार्वजनिक गरेको छैन ।
एमाले नवनिर्वाचित केन्द्रीय कमिटीको शपथग्रहण र पहिलो बैठक महाधिवेशनस्थल सौराहामै हुने तय भएको छ । केन्द्रीय निर्वाचन आयोगले नवनिर्वाचित केन्द्रीय कमिटीको शपथग्रहण र पहिलो बैठक सौराहामै गर्न लागिएको हो ।
