इन्द्रेणीपोष्ट
काठमाडौँ, १८ साउनः नेपाल रग्बी सङ्घले भारतमा हुन लागेको एसिया रग्बी इमिरेट्स यु–२० सेभेन्स ट्रफीका लागि नेपाली यु–२० महिला टोली घोषणा गरेको छ । प्रतियोगिता आगामी साउन २४ देखि २७ गतेसम्म भारतको बिहारस्थित राजगीर रंगशालामा आयोजना हुँदैछ ।
१३ सदस्यीय नेपाली टोलीमा सम्झौता तुम्बापो, लक्की मगर, सनमिका मगर, रेखा खड्का, सुशीला सुनुवार, निशा घलान, रोश्ना पोखरेल, पूजा डङ्गोल, कविता बादी, आरुषी भट्टराई, सलिना माझी, समीक्षा गौतम र रमिरा शाही समावेश छन् । टोली साउन २२ गते भारत प्रस्थान गर्ने कार्यक्रम छ ।
सावित्री पुर्जाको प्रशिक्षणमा टोली तयार पारिएको हो । नेपाल रग्बी सङ्घका महासचिव गोविन्द घिमिरेका अनुसार प्रतियोगिता स्थल भारतको मौसम अनुसार तयारी गर्न टोलीलाई सर्लाहीको राधाकृष्ण खेल मैदानमा एक महिनादेखि प्रशिक्षण दिइँदै आएको छ ।
प्रतियोगितामा एसियाका ११ राष्ट्रका टोली सहभागी हुनेछन् । अघिल्लो संस्करण भने नेपालमा सम्पन्न भएको थियो । यस पटकको सहभागिताबाट नेपाली टोलीले अन्तर्राष्ट्रिय अनुभव सँगाल्ने अपेक्षा गरिएको छ ।
सोमबार, साउन १९ गते २०८२
Aug 04 2025 Monday
