इन्द्रेणीपोष्ट
अमेरिकामा हवाईजहाज, रेल र बसजस्ता सार्वजनिक यातायातमा यात्रा गर्दा मास्क अनिवार्य लगाउनु पर्ने नियम एक अदालतले हटाइदिएको छ ।
समाचार संस्था रोयटर्सका अनुसार फ्लोरिडाकी न्यायाधीश क्याथरिन किम्बल मिजेलले सोमबार सार्वजनिक यातायातमा मास्क अनिवार्य लगाउनु पर्ने नियम कानुनसम्मत नभएको भन्दै हटाइदिएकी हुन् ।
न्यायाधीश क्याथरिनलाई तत्कालीन राष्ट्रपति डोनाल्ड ट्रम्पले नियुक्त गरेका थिए । अदालतको आदेशपछि अमेरिकाका प्रमखु एयरलाइन्सहरूले आन्तरिक उडानमा यात्रुले मास्क अनिवार्य लगाउनु पर्ने नियम हटाएका छन् ।
मास्क लगाउने कुरा अब यात्रुको इच्छाको कुरा भएको छ ।
अमेरिकामा स्वास्थ्य अधिकारीहरूले मे ३ सम्ममा सार्वजनिक सवारीमा मास्क अनिवार्य लगाउनु पर्ने नियम लगाएका थिए ।
अमेरिकामा दैनिक ३५ हजार मानिस कोरोना संक्रमित भइरहेका बेला आएको अदालतको यो आदेशलाई राष्ट्रपति कार्यालय ह्वाइटहाउसले दुस्खद भनेको छ ।
सेन्टर फर डिजिज कन्ट्रोल एन्ड प्रिभेन्सनले सन् २०२१ को फेब्रुअरीदेखि सार्वजनिक यातायातमा मास्क अनिवार्य गर्न भनेको थियो ।
