इन्द्रेणीपोष्ट
काठमाडौं । पहेँलो रंगमा खेलाडीको नाम र नम्बरसहित क्यानले नेपाली टिमको जर्सी सार्वजनिक गरेको छ । हिजो (सोमबार) नेपाल क्रिकेट संघ (क्यान)ले एक कार्यक्रमको आयोजना गरेर उक्त टिमको जर्सी सार्वजनिक गरेको हो ।
यसै वर्ष (२०८०)मा आयोजना हुने ट्वान्टी–२० विश्वकपका लागि नेपाली राष्ट्रिय क्रिकेट टिमको जर्सी सार्वजनिक भएको छ । अत्यन्तै रुचाइएका खेलकुद सामग्री उत्पादन तथा बिक्रेता कम्पनी केल्मीसँगको सम्झौता जर्सी सार्वजनिक गरेको क्यानले जनाएको छ ।
नेपाली टिमको जर्सीमा सगरमाथा, एकसिंगे गैँडा, नेपालको झन्डा तथा खेलाडीको नाम र नम्बर पहेँलो रंगमा लेखिएको छ । जर्सी सार्वजनिक कार्यक्रममा केल्मी नेपालका कार्यकारी निर्देशक उत्तम न्यौपानेले नेपाली टिमको जर्सीमा बहादुरहरूको झल्को दिलाउन पहेँलो रंग राखिएको बताए ।
उनले भने, ‘रातो र निलो राष्ट्रिय झन्डाको प्रतिनिधित्वका लागि राखिएको छ । अन्तर्राष्ट्रिय मान्यतामा पनि बहादुर टिमले पहेँलो रंग राखेको इतिहास देख्यौँ । त्यही भएर हामीले नेपालको जर्सीमा नेपाल र खेलाडीको नाम पहेँलो रंगमा राख्यौँ ।’
नेपाली टिमको जर्सी सार्वजनिक कार्यक्रममा खेलकुद मन्त्री विराजभक्त श्रेष्ठ, केल्मीका कार्यकारी निर्देशक उत्तम न्यौपाने, क्यानका पदाधिकारी, विभिन्न क्षेत्रका व्यक्ति र सञ्चारकर्मीहरूको समेत उल्लेख्य उपस्थिति थियो ।
