इन्द्रेणीपोष्ट
काठमाडौँ, १२ साउनः प्रधानमन्त्री केपी शर्मा ओलीले आगामी मङ्सिर महिनाभित्र दसौँ राष्ट्रिय खेलकुद प्रतियोगिता सम्पन्न गर्ने गरी तयारीमा तीव्रता दिन निर्देशन दिएका छन ।
प्रधानमन्त्री निवास बालुवाटारमा आइतबार आयोजित छलफलमा प्रधानमन्त्री ओलीले युवा तथा खेलकुद मन्त्रालय र राष्ट्रिय खेलकुद परिषद्का नेतृत्वलाई चुस्त र प्रभावकारी तयारी अघि बढाउन निर्देशन दिएका हुन । उनले प्रतियोगिताको मिति र स्थान यथाशक्य छिटो टुंगो लगाउन तथा निर्णयपछि फेरबदल नगर्न आग्रह गरेका छन ।
प्रधानमन्त्री ओलीले सन् २०२६ मा जापानमा आयोजना हुने एसियन गेम्सको पूर्वसन्ध्यामा आयोजना हुन गइरहेको राष्ट्रिय प्रतियोगिता खेलाडीहरुको क्षमता अभिवृद्धि र छनोटका दृष्टिले महत्त्वपूर्ण हुने भएकाले समयमै तयारी थाल्नुपर्नेमा जोड दिएका छन ।
छलफलमा युवा तथा खेलकुदमन्त्री तेजुलाल चौधरी, मन्त्रालयका सचिव डा.हरिप्रसाद लम्साल, राष्ट्रिय खेलकुद परिषद्का उपाध्यक्ष ध्रुव आचार्य र सदस्य सचिव टङ्कलाल घिसिङ लगायतको उपस्थिति रहेको थियो ।
प्रधानमन्त्री ओलीले मन्त्रालय र परिषद्को नेतृत्वबीच सहकार्य र समन्वयलाई अझ मजबुत बनाउन आवश्यक रहेको पनि उनले बताएका छन ।
आइतबार, साउन १८ गते २०८२
Aug 03 2025 Sunday
