इन्द्रेणीपोष्ट
चितवन, १० साउन – नेपाली कांग्रेसका नेता तथा गण्डकी प्रदेशका पूर्वप्रदेश प्रमुख पृथ्वीमान गुरुङको निधन भएको छ । ७६ वर्षीय गुरुङको आज बिहान ८ बजे भरतपुर महानगरपालिका – २६ स्थित आफ्नै निवासमा निधन भएको हो ।
गुरुङ विसं.२०७८ साउन १२ गते गण्डकी प्रदेश प्रमुखमा नियुक्त भएका थिए । यस अघि उनी नेपाली कांग्रेस चितवनका सभापति तथा नवलपरासी भूमिसुधार आयोगका अध्यक्षको जिम्मेवारीमा समेत रहेका थिए। पार्टी विभाजनको समयमा गुरुङ प्रजातान्त्रिक कांग्रेसका जिल्ला सभापति पनि थिए ।
वि.सं.२००६ मा कास्कीको माछापुच्छ्रे गाउँपालिका ल्वाङघलेलमा जन्मिनु भएका गुरुङ पछि चितवन बसाइँसराइ गरेका थिए । उनले वि.स.२०४६ को जनआन्दोलनमा कांग्रेस परिचालन समितिमा रहेर सक्रिय भूमिका निर्वाह गरेका थिए ।
विगत लामो समयदेखि क्यान्सर रोगसँग जुधिरहेका गुरुङका दुई छोरामध्ये जेठो छोराको पहिल्यै निधन भइसकेको छ भने कान्छा छोरा विदेशमा रहेका कारण उनको अन्त्येष्टि आइतबार गरिने पारिवारिक स्रोतले जनाएको छ । उनकी श्रीमती अहिले बेहोसमा छन ।
नेपाली कांग्रेसका केन्द्रीय सदस्य टेकप्रसाद गुरुङले पृथ्वीमान गुरुङको निधनले पार्टीलाई अपूरणीय क्षति पुगेको प्रतिक्रिया दिएका छन ।
आइतबार, साउन १८ गते २०८२
Aug 03 2025 Sunday
