इन्द्रेणीपोष्ट
काठमाडौं । पहिलो चरणमा ८२ मतले सभापतिमा निर्वाचित हुन असफल भएका शेरबहादुर देउवालाई दोस्रो चरणमा जित हात पार्न सहज हुने देखिएको छ ।
देउवाविरुद्ध पहिलो चरणमा सभापति पदमा प्रतिस्पर्धा गरेका चार जना नै मिल्दा पनि सबै मत कोइरालालाई नपर्ने भएकाले देउवा नै जित्ने अवस्था देखिएको हो ।
नेपाली काँग्रेसको नयाँ नेतृत्व चयन गर्न पहिलो चरणमा खसेको जम्मा ४६७९ मतमध्ये सभापतिका शेरबहादुर देउवाले २२५८ मत ल्याएका छन् । जुन सभापति बन्न आवश्यक पर्ने २३४० मतभन्दा ८२ मत मात्रै कम हो ।
देउवाको निकटतम प्रतिद्वन्द्वी शेखर कोइरालाले १७२९, प्रकाशमान सिंहले ३४७, बिमलेन्द्र निधिले २७३ र कल्याण गुरुङले ३२ मत पाएका छन् ।
काँग्रेसको विधानअनुसार सभापति पदमा पहिलो चरणमा कसैले ५१ प्रतिहत मत नल्याएमा दोस्रो चरण्माको मतदानमा जानु पर्ने हुन्छ, जुन प्रतिस्पर्धा निकटतम प्रतिद्वन्द्वीबीच हुन्छ ।
त्यसैले आजै हुने तय भएको दोस्रो चरणको निर्वाचनमा देउवा र कोइरालाबीच प्रतिस्पर्धा हुने छ। आफ्नो पक्ष बलियो बनाउन देउवा र कोइराला निकट नेताहरू बिहनैदेखि दौडधुप गरिरहेका छन् ।
