इन्द्रेणीपोष्ट
काठमाडौं । नेपाली कांग्रेस चितवन जिल्ला कार्यसमितिले केन्द्रीय परिपत्रभन्दा बाहिर गएर काम नगर्न निर्देशन दिएको छ ।
आसन्न स्थानीय तह निर्वाचनमा भरतपुर महानगरपालिका नेकपा (माओवादी केन्द्र)लाई दिने गठबन्धनमा सहमति जुटिसकेको छ ।
तर, चितवनका नेताहरु केन्द्रको उक्त निर्णयको पक्षमा छैनन् । त्यसैले जिल्ला सभापति राजेश्वर खनालले एक विज्ञप्ति जारी गर्दै केन्द्रीय परिपत्रभन्दा बाहिर गएर केही नोबोल्न नेता तथा कार्यकर्तालाई आग्रह गरेका हुन् ।
विज्ञप्तिमा भनिएको छ, ‘यस प्रक्रियालाई नकारात्मक प्रभाव पर्ने गरी केन्द्रीय परिपत्रभन्दा बाहिर गएर भेला, छलफल, गोष्ठी नगर्न र नगराउनका लागि पार्टीका सबै नेता तथा कार्यकर्तासँग विनम्रताका साथ आग्रह गर्छु ।’
उनले आसन्न स्थानीय निर्वाचनमा सबै पार्टी होमिसकेको भदै कांग्रेसले गठबन्धनलाई आत्मसाथ गरी अगाडि बढ्ने बताए ।
भरतपुर महानगरपालिकाको प्रमुखमा यसपटक पनि बहालवाला प्रमुख रेनु दाहाललाई उठाउने तयारी नेकपा (माओवादी केन्द्र)ले गरेको छ ।
