इन्द्रेणीपोष्ट
मन्थली रामेछाप, २३ साउन – रामेछाप र सिन्धुली जोड्ने खुर्कोटस्थित सुनकोसी नदीमाथिको बेलीब्रिजको मर्मत कार्य नेपाली सेनाले सुरु गरेको छ । पुलमा प्रयोग गरिएका केही नटबोल्ट खुस्किएर जोखिम बढेपछि सेनाको प्राविधिक टोली परिचालन गरिएको हो ।
महोत्तरीको बर्दिवासस्थित नेपाली सेनाको प्राविधिक टोलीले बिहीबारदेखि मर्मत कार्य थालेको हो । गत कात्तिकमा जडान गरिएको बेलीब्रिज गत असोज १२ गतेको बाढीपछि रामेछापतर्फका ५० मिटर स्पान बगाएपछि वैकल्पिक रुपमा निर्माण गरिएको थियो ।
सडक विभाग, नेपाल विद्युत् प्राधिकरण र नेपाली सेनाको संयुक्त पहलमा जडान गरिएको यो बेलीब्रिज प्रयोगमा आएपछि यातायात चाप बढेको थियो । यसका कारण पुलमा हल्लिने, लच्किने र नटबोल्ट खुस्कने समस्या देखिन थालेको थियो । जसले बेलीब्रिजलाई थप जोखिमपूर्ण बनाएको स्थानीय निकायले जनाएको छ ।
पुलबाट अधिकतम १५ टनसम्मका सवारीसाधन मात्र गुडाउन मिल्ने प्रावधान भए पनि त्यसभन्दा बढी तौलका सवारी सञ्चालन भइरहेका छन् । यसले मर्मतको आवश्यकता झनै तीव्र बनाएको हो ।
प्रमुख जिल्ला अधिकारी श्यामकृष्ण थापाका अनुसार दुई दिनभित्र मर्मत कार्य सम्पन्न गर्ने योजना छ । जोखिम कम गर्नका लागि सेनाको प्राविधिक टोली निरन्तर खटिएको छ ।
शुक्रबार, साउन २३ गते २०८२
Aug 08 2025 Friday
