इन्द्रेणीपोष्ट
काठमाडौँ, ९ साउनः हाल देशभर मनसुनी वायुको प्रभाव कमजोर देखिएको छ । जल तथा मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानको आसपासमा अवस्थित रहेकाले वर्षा गतिविधि पनि सामान्य देखिएको हो ।
महाशाखाले आज दिउँसो देशभर साधारणतया बदली रहने जनाएको छ । बागमती, गण्डकी र लुम्बिनी प्रदेशका पहाडी भू–भागका केही स्थानहरूमा तथा अन्य भू–भागका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना छ । साथै, बागमती र गण्डकीका पहाडी क्षेत्रका एक–दुई स्थानमा भारी वर्षा हुन सक्ने सम्भावना पनि महाशाखाले जनाएको छ ।
आज राति कोशी प्रदेशलगायत देशका पहाडी भू–भागमा साधारणतया बदली तथा बाँकी भू–भागमा आंशिक बदली रहनेछ । कोशी प्रदेशका केही र अन्य प्रदेशका थोरै स्थानमा मेघगर्जन÷चट्याङसहित हल्कादेखि मध्यम वर्षा हुन सक्ने प्रक्षेपण गरिएको छ ।
त्यस्तै, कोशी प्रदेशको तराई भू–भाग तथा मधेस प्रदेशका केही स्थानमा हावाहुरी चल्न सक्ने सम्भावना समेत महाशाखाको बुलेटिनमा उल्लेख गरिएको छ । मौसमको यथास्थितिलाई ध्यानमा राख्दै महाशाखाले सतर्कता अपनाउन नागरिकलाई सुझाव दिएको छ ।
आइतबार, साउन १८ गते २०८२
Aug 03 2025 Sunday
