इन्द्रेणीपोष्ट
काठमाडौं । दोस्रो स्थानको युभेन्ट्सविरुद्ध १–० को जित निकाल्दै इटालियन सिरी ‘ए’मा इन्टर मिलानले शीर्ष स्थानमा चार अंकको स्पष्ट अग्रता बनाएको छ ।
आइतबार राति सान सिरोमा इन्टरले युभेन्ट्सबाट आत्मघाती गोल उपहार पाउँदा तीन अंक थप्ने अवसर पायो । ३७औँ मिनेटमा युभेन्ट्सका फेडेरिको गाटीबाट भएको आत्मघाती गोल नै इन्टरको जितमा पर्याप्त बन्यो ।
जितसँगै २२ खेलबाट ५७ अंक जोडेको इन्टर दोस्रो स्थानको युभेन्ट्सभन्दा चार अंकले अगाडि छ । इन्टरभन्दा एक खेल धेरै खेलेको युभेन्ट्सको ५३ अंक छ ।
इन्टरले अब फेब्रुअरी १० मा छैटौँ स्थानको रोमासँग खेल्नेछ । युभेन्ट्सले भने त्यसको तीन दिनपछि युडिनेसविरुद्ध प्रतिस्पर्धा गर्नेछ ।
