इन्द्रेणीपोष्ट
काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेको थुनछेक बहस आज (बुधबार) पनि हुने भएको छ । आइतबार बयान सकिएसँगै सोमबादेखि थुनछेक बहस जारी छ ।
काठमाडौंको कालीमाटीस्थित स्वर्णलक्ष्मी सहकारी संस्थाको बचत अपचलन प्रकरणमा मुछिएका रविलाई थुनछेक बहसका लागि प्रहरीले जिल्ला अदालतमा उपस्थित गराएको छ ।
सहकारीको बचत अपचलनमा रविविरुद्ध अभियोगपत्र दायर भएको छ । उक्त अभियोजनको बयानका लागि उनी आफै आइतबार काठमाडौं जिल्ला अदालतमा हाजिर भएका थिए ।
बयान आइतबार सकिए पनि थुनछेक बहस सोमबारबाट सुरु भएको थियो । सोमबार बहस नसकिएपछि रविलाई न्यायाधीश माधवप्रसाद अधिकारीले हिरासत पठाउने आदेश दिएका थिए । न्यायाधीश अधिकारीले सोमबारको आदेशलाई नै निरन्तरता दिँदै बुधबारबाट फेरि निरन्तर सुनुवाइ गर्ने भएका छन् ।
रवि लामिछानेलाई भद्रकालीस्थित काठमाडौं प्रहरी परिसरको हिरासतमा राखिएको थियो ।
