इन्द्रेणीपोष्ट
काठमाडौं । प्रमुख सत्तारूढ कांग्रेस सभापति शेरबहादुर देउवा निवासमा मन्त्रीहरूले कार्यसम्पादनको ब्रिफिङ गरेका छन् ।
ब्रिफिङमा उनीहरूले वर्तमान प्रधानमन्त्री केपी शर्मा ओली सरकारको मन्त्रिपरिषद्मा काम गर्न कठिनाइ भोग्नुपरेको गुनासो गरेका छन् ।
ओली नेतृत्वको सरकारमा सहभागी कांग्रेसका मन्त्रीहरूले काम गर्न प्रधानमन्त्रीले स्वयंले असहयोग गरेको देउवासँग गुनासो गरेका हुन् ।
कांग्रेस सभापति देउवासहित पार्टीका शीर्ष नेता र मन्त्रीहरूबीच आज (बिहीबार) भएको छलफलमा मन्त्रीहरूले ब्रिफिङ गर्ने क्रममा अनेकन् गुनासो गरेका छन् ।
उनीहरूले काम गर्दा स्वयं प्रधानमन्त्री ओलीले नै बाधा पुर्याएको, सहयोग गर्न हिच्किचाएकोले आफूहरूले भनेजस्तो काम गर्न नसकेको भन्दै देउवासमक्ष कार्यसम्पादन कमजोरी स्विकार गरेका छन् ।
सभापति शेरबहादुर देउवा निवास बुढानीलकण्ठमा संसदीय कार्यसमितिमा छलफलका लागि १० मन्त्री र २ राज्यमन्त्रीलाई डाकिएको थियो ।
उक्त बैठकमा ओलीले अध्यादेशमार्फत राज गर्न खोजेको भन्दै केही मन्त्रीले असन्तुष्टि जनाएका छन् । संसद् बन्धक बनाएर अध्यादेशको बाटो रोज उचित नभएको उनीहरूले ब्रिफिङ गरेका छन् ।
