इन्द्रेणीपोष्ट
बलियो प्रतिद्वन्दी अस्ट्रेलियालाई २–१ गोलअन्तरले हराउँदै दक्षिण कोरिया कतारमा जारी एसियन कपको सेमिफाइनलमा प्रवेश गरेको छ ।
दक्षिण कोरियाका योङ वु सियोलले ३१औँ मिनेटमा गोल गर्दै टोलीलाई अग्रता दिलाए पनि भिडिओ असिस्टेन्ट रेफ्रीले अफसाइड भनेपछि गोल रद्द भएको थियो ।
फेरि ४१औँ मिनेटमा एटकिन्सनको क्रसमा क्रेज गुडविनले भली प्रहारमा गोल गरेपछि अस्ट्रेलिया अघि भएको थियो ।
तर दक्षिण कोरियाले इन्ज्युरी समयमा गोल बराबरी बनायो । इन्ज्युरी समयको पाँचौँ मिनेटमा कप्तान सन ह्युङ मिनले जितेको पेनाल्टीमा ह्वाङ हि चानले गोल गर्दै खेल बराबरीमा ल्याएपछि खेल अतिरिक्त समयमा धकेलिएको थियो ।
अतिरिक्त समयको १३औँ मिनेटमा कप्तान सनले उत्कृष्ट फ्रिकिक प्रहारमा गोल गर्दै कोरियालाई अग्रता दिलाए ।
अतिरिक्त समयको पहिलो हाफको अन्त्यतिर एइडन ओ’निलले रातो कार्ड पाएपछि अस्ट्रेलिया १० खेलाडीमा खुम्चिएको थियो ।
त्यसपछि भने कोरियाले थप गोल गर्न सकेन । दक्षिण कोरिया अब सेमिफाइनलमा जोर्डनसँग भिड्नेछ । जोर्डन शुक्रबार ताजिकिस्तानलाई हराउँदै अन्तिम चारमा आइसकेको छ.।
आज (शनिबार) बाँकी दुई क्वाटरफाइनल खेल हुने छन् । साँझ ५ः१५ बजे इरान र जापान तथा राति ९:१५ बजे घरेलु टोली कतार र उज्वेकिस्तान भिड्नेछन् ।
